O mestrado ensina como crear unha relación de axuda profesional baseada en construír alianzas terapéuticas coas familias en ámbitos como a saúde, educación, protección á infancia, servizos sociais, terapia familiar e de parella.

O mestrado baséase nun modelo de traballo ben definido en varios manuais e publicacións científicas. O ensino céntrase na práctica desde o primeiro momento: adestramento de habilidades e aprendizaxe de técnicas para intervir en contextos diversos. O alumnado que realizou este mestrado traballa actualmente como educadores/as familiares, terapeutas familiares, técnicos/as de protección á infancia, en programas de preservación familiar en servizos sociais, saúde mental, orientación familiar, enfermaría comunitaria e familiar.

Ademais do título de mestrado da UDC, esta formación está tamén acreditada pola Federación Española de Asociacións de Terapia Familiar (FEATF) para que quen o faga se poida certificar como Terapeuta Familiar (neste caso é obrigatorio completalo cun período de supervisión práctica).

Ao longo dos anos, o alumnado que pasou polo mestrado destaca estes aspectos especiais: o ambiente de motivación e optimismo que se crea nos seminarios e nas prácticas, a cohesión que se xera entre o alumnado, e os valores que sustentan o modelo de intervención (respecto e curiosidade, dignidade das familias, optimismo, resiliencia, convicción sobre a capacidade de cambio e crecemento).

O mestrado é de tipo presencial, pero a súa estrutura permitiu que moitos alumnos e alumnas compatibilizasen a súa realización con outras actividades (tanto de traballo como outros estudos).

Consta de 1500 horas: distribuídas en 625 horas realizadas no primeiro ano (25 ECTS) e 875 horas (35 ECTS) no segundo. Facer o mestrado en dous anos é necesario para asentar as habilidades de intervención e, ademais, unha condición da FEATF para a acreditación de terapeuta familiar.

O segundo ano ten unha orientación moi práctica, baseada en prácticas con familias e menores, que se asenta en toda a formación teórica e de habilidades do primeiro ano. Por outra banda, ao longo do segundo ano realízanse tres obradoiros deseñados para conseguir unha realización exitosa do Traballo Fin de Mestrado .

Toda a actividade docente ten lugar na UIICF, que está situada no Campus de Esteiro (Ferrol). A UIICF ten salas de intervención, sala de espera, salas de equipo, laboratorio de vídeo, despachos e unha aula.

O mestrado consta de seminarios e obradoiros intensivos (en sábados alternos). Durante todo o segundo ano inclúe prácticas que se realizan un día da semana que o alumnado elixe (5 horas, ben pola mañá ben pola tarde). Estas prácticas pódense facer na propia UIICF (Ferrol), na Coruña, Lugo ou Pontevedra.

O alumnado forma parte do equipo de intervención familiar, observando en vivo as sesións de traballo coa familia e participando co equipo profesional na valoración dos casos e no deseño do plan de caso e de todas as intervencións durante o proceso.

Os profesores e profesoras que colaboran actualmente co mestrado foron valorados moi positivamente polo alumnado ao longo das sucesivas promocións. O seu perfil xeral inclúe: capacidade didáctica e experiencia académica ou de supervisión, ter experiencia práctica consolidada, alta motivación para a intervención familiar e optimismo.

Ter unha titulación de grao (ou licenciatura) no ámbito da saúde, educación, ou social (Educación Social, Enfermaría, Psicoloxía, Psiquiatría, Traballo Social). A solicitude de admisión pódese facer no enderezo http://uiicf.net/formulario-inscripcion/

Tamén se pode solicitar información adicional ou resolver dúbidas no correo interfam@udc.es ou no teléfono 646 102 004.

O proceso de selección inclúe unha entrevista persoal previa á admisión definitiva.

O prezo da matrícula polos dous anos é de 2900 € (1450 € por ano). A matrícula pódese pagar fraccionada (mesmo en mensualidades).

A universidade ofrece bolsas parciais para realizar este mestrado (o número de bolsas está en función do número de alumnos/as que se matriculen).

Esta é unha pregunta persoal que te debes facer se che interesa este mestrado . Nós tentamos (na entrevista inicial para a admisión e na formación que ofrecemos respecto diso) que coñezas ben que pretendemos con esta formación e en que consiste. Ese coñecemento debe ser a base para unha boa elección. Para nós é fundamental que as persoas que entran no mestrado estean motivadas e ilusionadas; queremos que, ademais de aprender, vivan unha experiencia de crecemento profesional e persoal.